गुन्डा नाइके चक्रेलाई अस्पताल लान नियम मिची चलखेल

केन्द्रीय कारागारमा जेल भुक्तान गर्दै आएका डन चक्रे मिलनलाई शिक्षण अस्पताल पठाउन कारागार प्रशासनले नियम मिचेर चलखेल गरेको अनुसन्धानवाट खुलेको आजको नयाँ पत्रिकामा खबर छ ।

महानगरीय प्रहरी आयुक्त कार्यालयले गरेको छानविनमा जेल प्रशासनको कमजोरी भेटिएपछि दोषी प्रहरीलाई कारबाहीको सिफारिस गरिएको छ । जेलका कैदीलाई वीर अस्पताल लैजाने गरिएको भएपनि चक्रेलाई भने उनकै इच्छा अनुसार शिक्षण अस्पताल पठाइएको अनुसन्धान प्रतिवेदनमा उल्लेख छ । शिक्षण अस्पताल चक्रेकै क्षेत्र भएकाले उनी त्यहाँ गएको प्रतिवेदनमा लेखिएको छ ।

चक्रेले जेलमै बाहिरबाट साथीहरु बोलाएर जन्मदिनको पार्टी दिएको तथा प्रहरी अधिकारीले फोटो खिचेको घटनाको सम्बन्धमा गठन गरिएको छानबिन समितिले जेलाका सुरक्षा प्रमुख डिएसपी रमेश खड्काको समेत अनुगमनको कमजोरी रहेको औँल्याएको छ ।

महानगरीय प्रहरी अपराध महाशाखाका प्रमुख विजयलाल कायस्थ संयोजकत्वको छानविन समितिले अन्य ६ प्रहरीलाई भने विभागीय कारबाहीको सिफारिस गरेको छ ।