पतिको कुटाइबाट श्रीमतीको मृत्यु

पर्सा, २ भदौ । वीरगञ्जमा शनिबार राति पतिको कुटाइबाट एक महिलाको मृत्यु भएको छ । वीरगञ्ज उपमहानगरपालिका वडा नम्बर १७ आत्माचोकस्थित जाकिर हुसेनको घरमा डेरा गरेर बस्दै आएका लम्जुङको गोश्वारा– ५ घर भएका ३७ वर्षीय सुन्दर खड्काले ३२ वर्षीया  श्रीमती सुशीलालाई कुटपिट गरेर हत्या गरेको जिल्ला प्रहरी कार्यालय पर्साले जानकारी दिएको छ ।

परवानीपुरस्थित सुन्दर स्टिल्स कारखानामा सुरक्षा गार्ड पदमा कार्यरत खड्का र उनकी श्रीमतीबीच बिहान ११ बजेबाट विवाद भएको थियो ।

खड्काले राति मदिरा सेवन गरी कुटपिट गरेर हत्या गरेको जिल्ला प्रहरी कार्यालय पर्साले जनाएको छ । महिलाको शव परीक्षणका लागि नारायणी अस्पतालमा राखिएको छ भने खड्कालाई प्रहरीले पक्राउ गरेको छ ।